黃金燒味 (Closed)

不嬲都好鍾意食燒味，聽朋友講灣仔呢間新開嘅黃金燒味好食，所以就決定放工過嚟試吓。我哋嗌咗個二人套餐，只係二百零蚊，有老火湯、有飯，有嘢飲，仲有超多款餸，真係好抵食。我哋揀咗乳豬拼肥燶腩叉、鼓椒蒸黃花魚，個餐仲包埋涼拌滷水拼盤同埋骨湯浸時蔬，分別係鳳爪加黑木耳同埋蠔油菜心。老火湯都幾大碗，飲落好香濃，而且好足料。佢嘅乳豬皮超級脆，配埋甜甜地嘅醬汁，用嚟送飯一流。落單嘅時候，店員提過我哋話肥燶腩叉啱啲鍾意食肥叉燒嘅人，我哋梗係要嗌嚟試吓啦。上枱嘅時候果然冇令我地失望，啲叉燒肥得嚟唔會太膩，真係好正。黃花魚比想像中大條，賣相超靚，而且仲好香。啲魚肉好滑，食得出係好新鮮嘅魚。鳳爪份量夠多又大件，口感唔錯。蠔油菜心都好新鮮，冇乜油，感覺好健康。另外我哋仲嗌咗酒香汾蹄，份量都好多，食到微微嘅酒香，配埋酸酸地嘅醋，真係忍唔住食咗好多件。鵝頸頭都好大份，好香口，建議用嚟送酒。佢嘅杏仁茶都好香好好飲，值得一試。