Home Sweet Home (Closed)

每日返工放工咁單調，唯一可以令我有動力既就係放工食好野！今次揀左間位於太子既西餐廳，叫「home sweet home」，一入到去，果然店如其名，每張檯都有朵玫瑰同埋蠟燭，再配合幽暗既燈光同埋浪漫既音樂，果然係sweet home！講返食物先，佢既set都會有份前菜，分別係「黑魚子蟹肉他他」、「海鮮酥皮小盒」同埋「龍蝦菠菜湯」，三樣都小巧玲瓏，又精緻又好食！至於主食方面，我地先黎一個「澳洲和牛牛柳。芝士烤波士頓龍蝦」，牛柳叫左七成熟，黎到切開就知係頂級，肉嫩多汁，每啖都值得細味！而龍蝦都好有鮮味，所以就算Ｄ殼幾難拆都唔好浪費每一小撮肉！另外仲叫左一個套餐「香煎挪威三文魚。燒原隻虎蝦」份三文魚鮮甜肉厚，虎蝦都係啖啖肉，同埋有好多薯菜伴碟，一定夠飽！之後就係甜品啦！係朱古力心太軟！一刀輕輕切下，入面既朱古力就應聲流出，食落去甜到漏呀！最後要介紹飲品，分別叫左杯「洛神花蘋果蜜」同埋「莫希托」。前者有盞紅色燈係杯野飲入面，好夢幻！杯飲品酸酸甜甜好開胃！而「莫希托」係檸檬混入香茅既特色飲品，幾得意！