楚撚記大排檔 (馬頭圍道) (Moved) New Location

之前見到呢間餐廳冠名贊助一個演唱會，所以就心思思去試吓佢個大排檔餐廳，舖頭喺土瓜灣馬頭圍道，都幾方便搵嘅，估唔到佢貌似大排檔，其實都係一間乾淨企理嘅餐廳。我哋嗌左個招牌菜黑松露蓮藕墨魚餅，墨魚餅煎得非常香脆但唔油膩，墨魚肉爽口彈牙，配埋滿滿嘅黑松露，真係一個好好嘅小食。另外就嗌咗兩個小菜，小炒王方面，鑊氣十分足，材料非常之多，叉燒蝦乾魷魚腰果，一啖食落去有唔同嘅口感同層次。另外薯仔牛柳粒亦都係我大排檔必點嘅菜，薯仔粒恰到好處，切得細細粒一啖一口，而且外皮香脆，沾滿左滿滿嘅蜜糖，而牛柳粒更加係淡淡牛香，配埋白飯真係送飯一流。最後仲有糖水送埋，今日係有得揀番薯糖水或者係清補涼，食完飲番碗清補涼清清喉嚨，真係一個好貼心嘅服務。