喜喜冰室 (Closed)

本來想試嘅食店揾唔到，黎左喜喜冰室到試下，見佢咁出名，一定有番啲特色野嘅。去到，剛好有張卡枱走，好好彩唔使等位，但要同另一對人share。啱啱係樓梯前一張卡枱，非常迫，差啲入唔到去，只能用單手拎野。餐牌環境都係好懷舊feel，但價錢一啲都唔相宜，幾枱人都係咁講，好在唔係得我一個覺得啫。一場黎到，食貴啲都無所謂啦。伙計落單唔使寫低，轉頭就遞上單，仲有個大夾夾住。好快送上嘅熱奶茶，香，滑，好飲！免治牛肉飯，隻差唔多全生嘅蛋好吸引，食落好有蛋味味腥，整體味道唔錯嘅，酸酸咸咸嘅肉醬配上粒粒白飯。另一份叫左常餐，叉燒意粉，呢樣真係無特別可言，味道一般，份量偏少。常餐跟嘅雙蛋多士，牛油多香口，已經搽定牛油先烤，所以啲牛油全滆又真係幾好味嘅。雙蛋同樣只係微微煎過，都係好有蛋香。五六十蚊食碟飯唔包野飲，話好貴又唔算嘅，今時今日，食一百蚊碗嘅拉麵都大排長龍啦，不過啲伙計同收銀可以唔好咁串會感覺良好啲囉。