木子甜品 (Closed)

呢間甜品我成日都食架，要推介呀！ 因為我好中意食芋圓，所以成日都黎呢間野食！呢間開左唔算係好耐，啱啱開果陣好多人排隊架，而家就少左d。今次叫左仙草2 號同宇治豆花芋圓加海底椰。仙草2 號有一個仙草雪球咁既野、腰豆、芋圓、仙草等等。真係好好食 ，但我就覺得佢甜左少少。個仙草雪球幾特別架，未試過食有仙草味既雪球，味道好清新。佢d 芋圓好QQ 架！正！ 咬落去好有口感。宇治豆花芋圓係我既至愛黎架！但因為次次去都叫，所以今次叫左第二個，然後叫男朋友叫呢個。 呢個係超好味，佢有一個抹茶雪球，有好多芋圓、紅豆同豆花。 點解我咁中意佢係因為我本身就唔係咁中意太甜既糖水，呢個就有豆花中和返佢既甜度。另外個抹茶雪球好香，唔會有好重奶味。 佢d QQ 芋圓份量好多，好似係極都食唔完咁。下次再去既話我都係會食返宇治豆花芋圓架！而佢地既價錢都好抵，仙草2 號都係$19 蚊，宇治豆花芋圓都係$24 蚊。好平呀！ 真係好開心有一間食芋圓既糖水係屋企附近。