北海道爐端燒 (Closed)

北海道爐端燒係亞士厘道，喺尖沙咀地鐵站行過去只係幾分鐘時間，真係好方便。一入到去就見到好多日式燈籠，成間舖嘅裝修好特別，好有日式風味。首先一定要推介嘅就係佢嘅海膽魚籽蟹肉蟹膏燒。佢嘅賣相真係超級靚，海膽、三文魚子同蟹肉夠晒鮮甜，而蟹膏就帶有海鮮嘅鹹味，四樣嘢嘅味道非常夾，一次過將佢地擺入口，真係好正。另外我哋嗌咗佢嘅左口魚邊壽司，左口魚充滿油脂，入口即融，同一般嘅連鎖壽司店嘅左口魚真係有好大分別。如果係鍾意食左口魚嘅話，個人認為呢樣係必嗌嘅菜式。炸日本生蠔一共有五隻，每一隻都炸到熱辣辣脆卜卜，啲炸粉唔會好厚，真係做到外脆內熱，而且食得出啲生蠔好新鮮，一啲都唔腥，點埋佢特配嘅醬汁，真係好好食。油甘魚刺身又厚又大件，色澤同紋路都好靚，魚肉非常鮮甜。炙烤三文魚押壽司一共有六件，係本身已經有醬油嘅壽司飯上面擺上厚厚嘅三文魚，將三文魚炙燒之後再加上三文魚子，同一般嘅卷物好唔同，非常值得一試。最後我哋嗌咗個好足料嘅帶子魷魚燒，上面有好多紫菜同埋木魚絲，蛋入面就有好多帶子同埋魷魚，配埋佢嘅沙律醬同燒汁一齊食，真係好有日式風味。希望下次有機會可以試埋佢其他菜式啦。