Running 燒 (Closed)

今日同男朋友去食期待已久嘅燒肉放題😋環境好闊落，坐得好舒服☺️一坐底職員就放低個冰桶比我地，係可以出去夾蝦嘅，之前嘅燒肉店都未試過，梗係要即刻出去試吓啦～出到去見到蝦嘅數量都好多，而且好生猛，隻隻都跳跳紮咁，夾嘅時候都要好小心，唔係好容易彈到d水上面，可見真係非常新鮮🤣👍🏻玩完夾蝦就當然要燒肉啦，食物方面非常多選擇，海鮮方面有原隻扇貝、鮑魚仲有蠔！鍾意食海鮮對我表示非常滿意😍😍肉方面亦有好多唔同嘅選擇，除咗唔同部位，仲有唔同味道，連羊肉都有，真係令我喜出望外😋怕唔夠味嘅出面都仲有好多醬料可以選擇，有日式風味，東南亞風味，令燒肉嘅味道更加豐富！至於蔬菜方面，會有一個自助區俾我哋自己夾，最鍾意嘅一定係牛油粟米！可以自己決定牛油同粟米嘅比例，我仲自己加咗少少蒜落去，真係好正！另外都會有一啲涼拌菜，亦都可以點炸物～甜品方面仲有dreyer’s雪條，亦都有唔同種類嘅飲品。總括嚟講，食物種類非常多，非常新鮮，味道都好好，絕對會再嚟食多一次！😋😋