韓流村 (Closed)

早一個星期就訂定位食醬油蟹，餐廳門口較細，有啲難搵。見到呢個牌，行落地牢就係餐廳啦先上醬油蟹，兩隻蟹四個人食剛剛好，第一次食生蟹，估唔到咁鮮甜，肉質同個殼都好淋，啲汁有啲咸，用黎送飯食平衡番個味道。不錯因為我中意食海鮮，第二樣值得推介嘅係燒帶子，四隻帶子size大到鋪滿成塊鐵板，大約燒幾分鐘，等待期間可以食住爐邊蛋先(蛋漿任添)，待帶子可以輕易『離殼』就食得，帶子好新鮮，啖啖肉，好想叫多一round再食，不過要留肚食其他食物。唔好以為得咁少野食，其實仲有牛筋骨，豬腩肉等等擺左係一邊。餐廳座位有啲逼，抽煙功能尚可改善，可能因為係地牢，啲韓燒味散唔到，食完成身味道離開。侍應不夠醒目，不會自動問我地是否要加蛋和菜，要舉手叫好耐先有人應。