麺屋こころ

Open Now

Now Closed

星期日去左donki入返啲零食返屋企，行開見有啲餓就緊係要食返個tea啦，兜左個圈見到有間食日式撈麵嘅鋪頭，湯麵同沾麵就見得多，撈麵就真係第一次見，咁就決定去試下啦。下午茶時段唔算太多人，等咗10分鐘就可以入去啦。坐底之後就叫咗個牛油醬油枝豆開開胃先，枝豆唔會太淋，保持爽脆，而牛油令枝豆更香，平時一般食枝豆都會有層鹽喺面嘅，而佢嘅醬油枝豆就冇呢個情況，唔會過咸之餘又有醬油嘅香味，十分特別。天氣咁熱，叫咗個柚子鹽味撈麵，呢款係冷麵，柚子嘅香味好濃烈，酸酸地咁好開胃好fresh，麵質好爽口彈牙，配埋慢煮雞肉真係一流。仲有最基本嘅鹽味撈麵，鰹魚汁同麻油嘅香味完全滲入每一條麵條，有食緊傳統湯麵感覺。平時喺日本食湯拉麵我都會配返碗白飯嘅，咁先可以食盡每一啖湯丫嘛。呢度都可以免費問店家拎啲白飯，食埋碗底嘅撈麵汁，一啖都唔會浪費。