小草十八怪石鍋米線 (Closed)

食物一定煮好熱辣辣食最好食，旺角呢間米線用石鍋盛載，長期將溫度維持，食到最後都仲係熱辣辣。餐牌上見到配料選擇有成四十幾種，花多眼亂，除咗平時米線常見嘅配料之外，比較特別嘅有封門牛肉、墨魚頭、麻辣小龍蝦、北海道帶子、紅燒螺片等。湯底方面更有七款選擇，我哋叫咗沙嗲湯同極品蟹皇湯，沙嗲湯非常濃郁，仲有少少偏甜嘅香味。極品蟹皇湯入面真係有蟹肉同蟹黃，夠晒真材實料！石鍋米線仲可以揀自己煮定店員幫你煮，餐牌上有米線嘅烹煮步驟，簡單又有趣。除咗米線，餐廳仲有蒸飯、烤魚同串燒等，我哋仲叫咗南乳雞翼同椒麻蝦餃腐皮脆卷作為小食，脆卜卜而且份量都幾多。