茶木‧台式休閒餐廳 (MegaBox) (Closed)

忍唔住要再黎多次！茶木呢期做小丸子主題，相信好多人都收到風。上星期去完銅鑼灣世貿分店食完，感覺非常良好！但因為每間分店都有唔同嘅限定菜式，好似世貿分店就係「小玉南瓜魔法」同「小丸子熱香餅」。今次一早做定功課，就係要試吓MegaBox分店限定嘅沙茶大蔥牛小排同小丸子吐司禮物盒！嚟到MegaBox，真係不得不講下依度嘅環境同裝修，雖然有部份人會認為Megabox頗隔涉，但我卻認為依度係拍拖勝地，地方夠大之餘食完仲可以去行宜家傢俬，係星期六日嘅好去處。茶木就係G/F, 樓底極高，座位又夠寬敞，俾人感覺好舒服。 打開餐牌，梗係要叫呢度分店嘅限定菜式啦。小丸子鰻魚番茄肉燥飯- 依個其實上次已經試過，佢個醬汁勁好味，又夠濃，配埋熱辣辣嘅燒鰻魚，非常正！沙茶大蔥牛小排 - 牛仔骨整得好淋好入味，啲京蔥爆得好香，食落有啲辣辣地，好惹味。小丸子吐司禮物盒 - 大家有去過茶木，都一定會對佢哋嘅甜品或者吐司好有信心，呢個都唔例外！為我哋今晚嘅晚餐添上一個完美嘅句號。