老鍋台式火鍋 (金馬倫道) (Closed)

成日聽朋友提起呢間台式火鍋，趁住今日凍凍地，一於暖下個胃。門口接待至入座非常有禮兼順暢，座位寬闊舒適，枱面用具乾淨齊全。裝潢陳設古式古香，擺放整齊，都幾衛生。唔好講咁多Order過尚膳養生鍋先，打開個蓋，非常濃厚嘅藥材味湧出來，眼前嘅係人蔘同好多滋補藥材，飲啖湯個人成個暖哂，真材實料有回甘嘅人蔘味。好啦！可以開始淥嘢食啦！安格斯雪花肥牛雪花平均，略略焯熟入口鮮嫩牛味幾香；千張豆葉紙其實係腐竹皮，放落湯1秒再撈起，立即吸收湯汁，超級好味！墨魚味好重嘅黑白滑，顏色靚靚食慾大增，而且非常彈牙！朋友叫我必點嘅咸蛋炸魚皮，依然冇介紹錯，好香鹹蛋味，又係1秒傑作，小小咸又吸收左少少湯汁，夠晒鹹香惹味！有乜好得過用易吸湯汁嘅材料做火鍋，白玉毛瓜雙拼係白蘿蔔同毛瓜，仲好有心思整成蝴蝶型添！仲有仲有，點少得新竹米粉，養生湯米粉完成！食熱辣辣嘅火鍋最好就有凍冰冰嘅飲品啦，杭菊露、烏梅汁，兩樣都冰凍好味，尤其是杭菊露，飲落去好滋養舒喉。店員不時巡視客人需要加湯收碟等，都幾落力，食物質素唔錯，回頭指數極高！