Häagen-Dazs (Closed)

晚餐食咗唔多，諗黎諗去都冇咩想再食，埋單轉戰甜品！熱咗咁耐，好似都冇點食雪糕，於是就去咗哈根達斯。叫咗個愛琴海兩份食，雪糕揀咗vanilla, 咖啡軟心朱古力同冧酒提子。等咗一陣（我估係燒香蕉塊焦糖所以搞咗咁耐），好靚喎！（係咪因為叫愛琴海所以用藍色碟？）我真係好中意咖啡軟心朱古力，滲咗係裡面既朱古力碎，軟腍腍好好味，雪糕係口中溶化既時候，得番Ｄ朱古力係舌上似溶未溶咁，口感特別。哈根達斯被譽為係雪糕界既勞斯萊斯－－我都唔恨坐勞斯萊斯，得閒有杯哈根達斯俾我食就得啦。