潮人私房菜 (Closed)

我地一入到去, 同其他餐廳相比, 已經有不一樣既, 入到去果然好有家的感覺。職員安排左房比我地, 之後佢就介紹一下餐廳既招牌菜。呢度雖然話私房菜, 但都有好多菜式比客人選擇, 。我地點左幾道菜, 分別係花雕蛋白蒸蟹、蘋果咕嚕肉、黃金四季豆同糯米雞。花雕蛋白蒸蟹一黎到已經令我地好驚訝, 隻蟹好大隻, 蟹蓋中都有唔少蟹膏, 蟹鉗好大好多肉, 好鮮甜, 蛋白好嫩滑, 有些少花雕味, 更有濃郁蟹既鮮味, 蛋白吸收哂所有精華。邊個話糯米雞係無雞? 呢度糯米雞一打開就有一大隻雞, 糯米飯已經入哂味, 黏度恰度好處,粒粒分明, 而雞肉好嫩, 兩者一齊食, 更加好味!蘋果咕嚕肉就真係第一次試咁既配搭, 咕嚕肉炸得好香脆, 仲有陣陣蘋果香味, 食落酸酸甜甜幾開胃, 估唔到咁既配搭都可以比佢諗到, 帶比我地新鮮感, 蘋果同咕嚕肉都可以係埋一齊!我地都清得七七八八, 最後一定唔少得甜品!芒果布甸做成鯉魚型, 好可愛。水塘變作花奶, 花奶好香滑, 芒果布甸入口即溶。食左咁多道菜, 最後食一道甜品畫上完美既句號。呢度無論環境同菜式都比到我家既感覺, 果然係私房菜!