卡莎338 (Closed)

一向都知深水埗係個平民美食天堂，由小食到多國菜都平靚正，呢日就同朋友約左去呢間西餐度鋸扒，舖面好大又喺正轉角位，好易搵。晚餐選擇頗多，價錢都好親民，人均都係百零蚊，已經包左主菜、餐湯同餐飲，中意chill drink既話仲有餐酒選擇。上菜速度快，落單一陣餐湯同蒜蓉包就到，我地點左一紅一白。紅湯飲落偏清淡，可能為左就返素食者口味所以無落肉吊味；反而白湯幾令人驚喜，好濃郁，而且加左黑松露提鮮，令人忍唔住一啖接一啖，蒜蓉包亦烤得幾脆。我點既肉眼扒雖然唔係最貴果款，但質素絕對對得上價錢。肉質軟熟，唔會好韌，火候煎得適中唔會overcook，配埋黑椒汁好惹味，伴碟既薯條亦炸得好脆身。