王子私房菜

Open Now

Now Closed

留意返，要善用網上攞飛等位，女士同老友記需備外套，坐近風位時可保暖。呢度坐得舒服，枱同枱之間留有一定空間。店員非常有禮，服務周到，唔會chur住咩都快，氣氛好適合休閒嘆點心。小食話梅粉番石榴同XO醬可以揀唔要，開茶時同店員講聲就會攞走，唔會記數收錢。老友記發現咬得開番石榴片後好開心，亦鍾意佢甜甜酸酸好醒胃。大力推介叉燒包，入面有好多細片狀叉燒，同肥膏多過肉或者汁多過料的包包有明顯分別，係近期食過最真材實料的叉燒包。蘿蔔絲酥餅外層鬆化，最欣賞蘿蔔絲係幼身版，有一種食得出的細緻感。中山王子鴿選用BB鴿，肉嫩夠入味，牙力唔多好的老友記都可以輕輕鬆鬆KO咗半隻，仲食得好滋味添。三色腸粉皇賣相好，尤其隻若隱若現大蝦。食落最好味反而係叉燒同牛肉，牛肉有香濃陳皮味，甜豉油調味適中易入口。翡翠帶子餃、蝦餃同咸水角普普通通咁啦，老友記一錘定音話另一間的蝦餃好味啲，下次由佢帶隊去試吓。