星級扒房 (Closed)

父親節喺旺角搵食，一係多人一係加價。唔覺意見到呢間扒房，$138一客西冷仲有半自助頭盤任食，即刻拍板光顧。餐廳面積唔大，但環境唔錯，都算舒適清靜。半自助頭盤主要有沙律吧（菠蘿、哈蜜瓜、西瓜、三角豆、腰豆、粟米、蔬菜）、螺絲粉沙律、泰式鳳爪、焗釀蛋、蒜蓉包、薯條及薯角無限添食。擺食物嘅位置雖然細，但廚師經常refill，絕對冇欺場。啲沙律料好新鮮，鳳爪辣味適中，蒜蓉包酥脆，釀蛋好味。唯一可惜係我錯過咗一款熱批，畀人攞晒冇refill, 試唔到。餐湯係要同侍應點嘅。番茄湯或周打魚任㨂，我㨂咗前者，味道唔錯。飲完湯食完沙律同小食其實已半飽，想試埋周打魚湯都無能為力。主菜西冷扒，厚切一大塊，比想像中大件。講真，自己間中去百佳買牛扒，都好知價。$138一個餐我唔會預佢畀呢個分量我，所以上枱嘅一刻已經有驚喜。但更大驚喜係個扒真係grill而唔係煎，真係做到我五成熟嘅要求，充滿燒烤香味同肉味，仲有軟滑嘅薯蓉相伴，真係好滿足！甜品係咖啡布甸，味道極佳。稍為失色嘅係咖啡，味道稍澀。今時今日，$160都唔使食到質素唔錯嘅扒餐，仲有咁多嘢任食，性價比真係超值，睇得出老闆好有heart，希望佢生意好。