馬祖台灣養生湯麵館 (和安里)

Open Now

Now Closed

日期：9月18日人數：4人話說公司最近嚟咗個新同事，好鬼鍾意食米線。呢日就同埋佢一行四個同事一齊去試呢間由佢推介，係蘭桂坊附近嘅台灣米線店。前身應該就係一間越南餐廳，以前我都好鍾意佢，但自從冇去一陣，再諗起果陣原來間鋪已經執咗。去到已經大概12:30 ，餐廳已經爆滿，我哋要等15分鐘先有位入去。Menu圖文並茂，加上款式都唔少，款款睇落都好吸引，簡直令我選擇困難症發作。最後我發現其他同事都揀藥膳雞米線或者餃子米線，咁我就揀古早牛肉麵先試吓啦。另外我哋仲加咗一份餃子同埋一份雞翼。米線上到來，飲下啖湯，又真係好好飲，同事果然冇介紹錯。而藥膳湯係最好飲嘅，亦都好夠熱，我自己都會推介叫呢一款。至於你鍾意食桃膠定係蟲草花之類就你自己選擇，冇乜所謂。餃子反而冇我想像中咁好食，餡料可以再豐滿啲。雞翼汁就整得幾好味，但未入到去隻雞翼度，雞翼中等大細，唔算好大隻。呢間小店環境有少少迫，樓上亦唔算有咩裝修，人手又唔太足夠，只有正常服務水平。價錢喺中環來講算叫做合理，一碗米線再加d小食就人均就來$100。