楓林小館

Open Now

Now Closed

以前Lunch已經好中意約埋同事嚟呢度飲茶，轉咗工之後就少咗飲，今日終於同返屋企人嚟飲茶，水準都仲係咁高！呢度係算係性價比好高嘅高級少少嘅茶樓，本身嘅裝潢已經比較高級少少，而坐位亦都比較舒服，唔會話好迫。食物嘅質素亦都好高，款式好多，仲會經常都轉款。所以每次去基本上都會可以試到唔同嘅款式。本身茶樓會有一d比較傳統嘅食物，但同時亦會有比較特色嘅食物，今次就試咗一個酥皮和牛撻，本身酥皮已經好鬆脆，加埋和牛再有層芝士喺上面，味道係估唔到嘅咁夾。仲有個柚子蜜蛋散都好好食！蛋散本身好鬆脆，再加埋柚子醬喺上面，酸酸甜甜咁好開胃！最估唔到嘅係佢啲甜品都好好食😂平時都好少喺茶樓食甜品，但佢嘅甜品真係好出色。以前食過一個桂花啫喱凍，一食落口嘅時候已經覺得好fresh，清清地又唔會太甜，但今次嚟已經冇咗，所以今次試咗個栗子西米布甸，佢都係秉承到唔會做到好甜，呢樣野真心好值得讚！