鐵路便當 (Closed)

鐵路便當係由真 • 手足開嘅台式食肆，呢度最大嘅特點係性價比超高，便當五六十蚊勁大盒包埋飲品，小食十八蚊起跳。雖然平，但係質素一啲都唔失禮，酥炸排骨便當（山葵芥末）塊排骨大到完全冚住個便當，一拎開，就見到底下鋪滿粉絲，冬瓜，滷蛋，酸菜，木耳等配菜，認真大件夾抵食。排骨同配菜味道較濃，但係唔會死鹹，幾滋味。再叫多三個小食，酥炸甜不辣同海山醬係絕配；臺南炸蝦卷（塩酥塔香）同夜市香腸就正常味道，後者如果多幾塊蒜片會更加正。唯一感覺麻麻係個宜蘭三星蔥貢丸湯，因為估唔到湯底係我唔鍾意嘅涼瓜排骨湯，而且成個湯都唔係好搵到三星蔥嘅蹤影😐。食到將近打烊，成間店剩返我哋一枱，同負責人傾左陣偈，了解咗一啲情況。畢竟間店位置認真麻麻，熱潮過後，能否繼續生存，真係要靠口碑。