玉桃軒酒家 (康怡廣場) (Closed)

本身諗住嚟呢間酒樓食片皮鴨，不過去到嘅時候差唔多七點幾八點， 部長已經話啲片皮鴨已經賣哂... 唯有試其他菜色啦...到最後叫咗佢嘅晚市套餐，有蒜香雞，蒸石斑同埋任選小菜一款...我哋就叫咗菠蘿咕嚕肉， 另外仲點咗個竹笙茄子豆腐煲。食酒樓菜其中一個特點就係啲餸菜夠鑊氣而且份量多，首先個雞炸得好香脆，裏邊有肉汁而且好嫩口，同時唔會話好生有血水， 個醬汁仲好食，係類似甜豉油不過有蒜香味。菠蘿咕嚕肉亦都好夠鑊氣，咕嚕肉甜甜酸酸，外皮香脆，裏邊就軟熟，不過菠蘿份量就偏少，反而青椒紅椒就好多。 竹笙茄子豆腐煲上菜嘅時候個窩係熱辣辣，竹笙嘅份量好多，而且夠爽口，索埋啲醬汁用嚟送飯就一流！最好食係條蒸石斑，一來佢蒸嘅時間啱啱好，唔太熟又都唔會太生，魚肉非常滑口，淋埋豉油同埋熟油真係好好食，而且佢啲骨唔多，亦都容易起，食得好方便！本身諗住淨係食餸唔叫飯，但係因為啲小菜真係好好食，亦都夠濃味，所以到最後都加多咗兩個白飯！下次有機會要早啲嚟再試下佢個片皮鴨先！