十十川滬料理 (Closed)

今日同媽咪去旺角行街，媽咪食開中菜，所以就揀左朗豪坊呢間十十川滬料理試下啦。一入到黎，覺得佢同平時嘅中式餐廳好唔同，完全冇好老土嘅感覺，環境幾舒服，座位闊落。因為媽咪唔食辣，所以揀左幾款唔辣嘅菜式。我地揀左雞絲粉皮、涼拌土豆絲、糖醋小排骨、嫩雞煨麵同埋手工黑糖糍粑。雞絲粉皮有濃濃嘅芝麻醬味，好香，粉皮好滑。涼拌土豆絲非常清爽唔油膩，好爽口，好開胃。糖醋小排骨份量十足，估唔到一碟有咁多肉，好抵食。酸酸地，食得多唔會好滯。肉質都好軟稔。嫩雞燶麵感覺好健康，雞肉好滑，湯底唔會過於濃味同味精感。甜品係另一個肚，我同媽咪都係第一次食手工黑糖糍粑。外面脆脆地，入面非常軟糯，一定要趁熱食，凍左就會硬架啦。我地覺得好好味！