你妳 (運通洋樓) (Closed)

好食是良知，信念一致都要食物入得口先得。見到呢間好評如潮，同芋泥控朋友一試，入座同落單時一位店員嘅態度唔太友善，好似畀人激嬲左咁，唔緊要啦香港人壓力大，食物正常就得啦，點知食物質素都強差人意，好彩我只係食個下午茶。私下同朋友分享先發現有其他苦主，去唔去自己衡量啦。 🍽你妳吐司套餐：芋見紫薯吐司配梅甘地瓜條 ($68⁣)吐司有芋見紫薯、肉鬆芋泥同紫薯泥肉鬆三款，配梅甘地瓜條或精選炸物籃。先唔講好唔好食，一撕開吐司嘅包裝紙就見到原隻小強屍體已經嚇親🙃店員當然換過份新嘅黎，吐司有烘過，但硬夾乾，芋泥同紫薯蓉份量幾多，都算幼滑，甜度唔高，但得紫薯有啲味，而且個餡凍冰冰，同我預想有出入。地瓜條炸到外皮脆身，甘梅粉比平時食開嘅酸，怪怪地。🍽甜品芋圓套餐：仙草3號配精選炸物籃 ($59)仙草3號有三色芋圓、包餡芋圓、珍珠同水晶，包餡芋圓厚實粉感重，三色芋圓食唔出各自嘅味，糖水甜度爆登，布丁就係兒時小食部嗰啲。芋圓套餐同樣配一款小食，叫左炸物籃，有蝦卷魚餅等，係全餐唯一擺得落口嘅食物。套餐包冬瓜茶或蜂蜜綠茶，問店員綠茶可否走糖，佢叫我加錢轉茉莉綠茶，換來有色凍水一杯。