スーパー丼 (駱克道) (Closed)

門口見到店內冇人客，仲以為只做外賣，開門問店員係咪冇堂食，佢話有堂食。行入少少只見到有一枱客人。相對隔幾個舖位嘅另一間要等位嘅Doraya 形成好大對比，食完後明點解呢間冇人排。打開個menu 魚生飯，甚至自選魚生配飯好少選擇，當刻好想走，但行到攰唔想再搵地方，將就吓叫個吞拿魚蓉三文魚子溫泉蛋飯。一嚟到就覺得好似喺啲凍肉食品店買啲魚生再舖喺飯面，見到pat吞拿魚蓉呈方形，而飯又煮唔好，性價比極低。堂食有加一，但只見成班員工喺前台圍埋傾計，見到後面枱客人叫咗幾次先有人應，間舖冇乜人，但又要叫佢嚟加茶先加。間舖咁冷清係有原因，食完心情好低落，返去同朋友呻，先知道原來呢間好出名。出名伏？原來係出名黃。唔係黃就大晒，好食是良知。