Burger Shot

Open Now

Now Closed

朋友介紹黎食呢間burger，話性價比好高，就趁今晚過開黎就去食下。餐廳係開放式廚房，但係好在冇咩油煙味。佢除咗Burger ，仲有小食，意粉同熱狗，佢嘅小食醬汁選擇都好多。雙層手打牛肉芝士漢堡食落有肉汁，唔會乾，配搭茄汁醬，幾開胃。安格斯牛肉芝士漢堡牛肉味幾濃，做到五成熟我中意個包好軟熟，個醬汁都幾夾。佢叫漢堡，意粉，或者熱狗加嘢飲就會送個薯條。個薯條份量好多，仲要係粗薯條。醬汁方面，個人推介蜜糖芥末，點完冇咁油膩，另外辣辣白醬，呢個係出面未見過，辣辣哋，好惹味。再叫左個炸魷魚鬚，幾好食，可惜份量比較少。飲品叫左白桃爆爆同芒果爆爆，係將梳打水倒入啲有爆珠的糖水入面，職員好細心提醒要小心慢慢搞拌，唔係好啲氣爆返上黎會整瀉。