八妹雞煲

Open Now

Now Closed

今日好開心約咗一個好耐見嘅朋友食飯，難得聚頭梗係要搵一個坐得舒服又可以傾到計嘅地方啦，搵咗一輪最後決定食朋友介紹嘅八妹雞煲，一路傾偈一路嘆一嘆個靚煲！去到見到啲裝修勁有特色，入邊嘅裝修好有舊時香港嘅感覺，醬料亦都應有盡有，而且非常之乾淨，唔會好似其他地方咁放醬料嘅地方會污糟邋遢。我哋叫咗一個小辣嘅雞煲，雞件有肉而且入味，我同朋友都覺得如果再煮耐啲會入味啲，但係而家都係絕對唔差！ 即炸響鈴！重點推介！響鈴嘅質地同其他餐廳嘅好唔同，更加香同埋更吸湯，我同朋友都覺得好好味。羊肉同牛肉份量絕對抵食，味道不過不失，啱三五知己一齊食；我同朋友兩個人黎，餐廳入邊亦都有二人嘅食物組合，例如蔬菜拼管同埋啲餃類嘅拼盤，我最鍾意食就係雲吞，而朋友就覺得淮山非常之正， 亦喺出邊好少會見到有得用嚟打邊爐。更值得一讚嘅係職員都好客氣同埋有禮貌，我哋二人座位但當嘢食上齊嘅時候張枱唔夠位擺嘢食，佢哋會推介銀色車仔嚟俾我地放野，而且係食緊雞煲嘅時候佢哋亦都會幫忙換骨碟。朋友都大讚我呢間餐廳揀得好啊！