Plato Cafe & Bistro (裕民坊YM²)

觀塘裕民坊商場都有唔少餐廳，呢晚發掘咗位於三樓平台花園嘅餐廳。餐廳除咗有室內，亦有戶口座位，望住個花園食飯都幾chill。餐牌除咗有dinner set（價錢由$98- $238)，種類十分之多，包括沙律、意粉、意大利飯、漢堡包、甚至乎扒類亦有提供。套餐包埋餐湯（甘荀湯）同$32以下嘅飲品，點咗杯冰果茶，味道唔會好甜，清新解渴。鮮菠蘿牛肉漢堡配薯條及沙律（$158）- 牛肉非常juicy，配酸酸甜甜嘅菠蘿，仲有蕃茄同生菜，味道非常有層次，薯條亦炸得香脆好味。龍蝦全日早餐（$168）- 呢個係單點餐牌入邊揀嘅，除咗有龍蝦之外，仲有炒蛋、腸、薯餅、蕃茄、窩夫及沙律菜等。龍蝦整得好香，味道唔錯。炒蛋亦炒得十分之香滑，薯餅好脆好乾身，好豐富好味嘅全日早餐。香蕉朱古力牛角窩夫配雪糕（$78）- 呢個要推介比朱古力控，香蕉配上朱古力醬，再配埋朱古力雪糕，非常之咁濃郁好味，窩夫亦做得香脆。留意呢個份量都唔少，兩至三人share都冇問題。