名館 (黃埔天地) (Closed)

與朋友相約喺紅磡食晚飯， 要搵一間坐得舒服又可以傾得耐嘅餐廳， 黃埔入面的美食坊 都係一個唔錯嘅選擇， 名館價格唔算好貴,  晚餐小菜連飯都係七八十蚊就有交易， 裝修算舒服企理，不過有一點我唔太喜歡的係卡位的背靠太矮, 我好怕撞到後面的客人。今日叫左幾道菜: 私房黃金球泡飯黃金球泡飯原來係一個炸過嘅波波球飯, 白飯搓成一個波形輕輕地走過油, 外層飯焦非常香脆， 而湯底非常濃郁， 入面嘅材料亦都非常多， 有毛豆蕃茄肉碎冬菇 同埋粟米， 口感豐富。 唯一美中不足係如果飯嘅份量唔係好夠大伙兒食, 如果份量再多一點就會更好。蜂蜜柚子蝦球大蝦球肉質非常爽身彈牙， 蝦球輕輕裹上粉再用油去炸， 炸粉不算太厚， 配埋柚子果醬， 入口酸酸甜甜， 開胃又爽口。黑金流沙包黑金流沙包即叫即蒸 ， 話明黑金其實係指包身係黑色， 包身有少少煙韌， 而蛋黃夠曬流心夠曬滋味，味道鹹鹹香香， 食嗰陣真係要睇住個嘴仔，小心辣親。五仁口水雞口水雞雞肉嫩滑， 配埋獨有嘅紅油， 淨係睇賣相 ，口水就一直不停流流流。 最特別係餐廳加咗啲五仁落去， 有花生芝麻杏仁南瓜子等等， 口感豐富一流， 配埋雞肉嘅嫩，一軟一脆，口感非常獨特。