越北牛肉粉

Open Now

Now Closed

荃灣西幾個商場連埋一齊之後真係好方便，又多野行又多野食，是日就同朋友黎左越北食下午茶。好好彩有張卡位坐，叫左份下午茶再加份小食，滿足下口胃先。🌶️順化湯檬自己點左碗順化湯檬，貪佢多餸又有辣湯底，最近愛上食辣，哈哈。餸有牛腩片、扎碲、扎肉、牛丸，鮮味又有口感。湯底鹹鮮微辣，幾好味噃，個人覺得可以再辣多少少嘅。檬粉爽口份量多，一碗都好飽下。🥢越北三寶湯河朋友叫左三寶河，三寶有香茅豬扒、香茅雞翼、扎肉，醃得好入味，豬扒尤其好食，軟腍無鬆肉粉味，個香茅味好出。朋友呢碗個湯底都好鮮味，河粉嫩滑。🦐峴港炸蝦餅香口彈牙，點埋個酸辣醬一流。🐖越式烤豬頸肉甜甜嘅醃醬好香口，豬頸肉爽口，又係好正。🍋鹹桔水&三色鹹檸七朋友點左凍嘅鹹桔水，入面有一粒鹹柑桔，鹹鹹地幾好味呀。自己點呢杯三色就犀利囉，有檸檬片、青檸仔、咸檸檬同薄荷葉，酸酸鹹鹹又清新，好好飲。點左咁多野都唔使兩百蚊，係抵食嘅！