Video
Read full review
2013-11-28
15 views
年中盛夏嚟過一次Spade by Lassana，當時店子主打售賣法式雪糕、自家烘焙嘅咖啡，以及酥餅、精緻嘅甜點，同埋多款特色三文治……等等，簡單嚟講，就以輕食為主。據店主講，稍後12月初將晌荔枝角區開新分店，因應客源，介時會以多款主食套餐為主打，所以依家先行晌度提早推出套餐，試試水溫兼吸納一下客人意見，以便作出適當調整，務求新店嘅出品更令客人滿意。所以，今晚跟食友獲邀嚟到，查實喺試菜俾意見多過嚟試食！上次嚟眼見個餐牌做得較簡陋，今次重遇，新簇鮮紅色嘅餐牌，感覺奪目醒神，餐牌內分為Lassana Toast、Lassana IceCream、Signature Dessert、Lassana Waffle、Lassana Parfait、Lassana Chillers、咖啡、花茶及舊有嘅All Day Set。比起舊有餐牌，種類分得更清晰，內容更仔細，而圖片更吸引，可見店方晌餐牌上都作出不少改進。溫故完就需要知新，全新推出嘅Meal Set套餐，提供一系列意粉及漢堡包類產品，單點包括：鮮蝦通粉配龍蝦汁（$74）、迷你蟹肉牛肉黑白漢堡（$70）、黑松露通粉（$72）、紅酒燴牛尾（$68
上次嚟眼見個餐牌做得較簡陋，今次重遇，新簇鮮紅色嘅餐牌，感覺奪目醒神，餐牌內分為Lassana Toast、Lassana IceCream、Signature Dessert、Lassana Waffle、Lassana Parfait、Lassana Chillers、咖啡、花茶及舊有嘅All Day Set。比起舊有餐牌，種類分得更清晰，內容更仔細，而圖片更吸引，可見店方晌餐牌上都作出不少改進。
溫故完就需要知新，全新推出嘅Meal Set套餐，提供一系列意粉及漢堡包類產品，單點包括：鮮蝦通粉配龍蝦汁（$74）、迷你蟹肉牛肉黑白漢堡（$70）、黑松露通粉（$72）、紅酒燴牛尾（$68）、肉醬千層麵（$62）、卡邦尼忌廉汁吸管麵（$64）共6款，每日12:00pm-2:00pm及6:00pm-10:00pm供應。既然喺套餐，自然可以加錢升級，升級選項有餐飲、餐湯及炒雪糕，收費為+$20可選1項，+35可選2項，而+$45可選齊3項，無加一小費，所以，主菜另要齊3項成為4道菜晚餐，都只喺$107-$119，已經喺既有質素又豐富嘅一餐，旺角區計，相當抵食。
忌廉蕃茄湯色澤鮮橙嘅忌廉蕃茄湯，蕃茄味非常濃郁，酸香醒胃，如果減低少少酸度就更稱心，質感稍稍稀咗啲啲，但入口仍然滑溜。意見反映咗，相信下次再試會更好！
鮮蝦通粉配龍蝦汁 $74（單點價）以上新出嘅套餐，部份食材都會晌工場做成半製品，就以依道通粉為理，個龍蝦汁以龍蝦頭、蝦殼預先熬製，為保鮮味仲會早一轉，晏一轉做好送出店舖，嚟到店舖有單時再加工，現場即點即煮。通粉質感恰好，龍蝦汁掛勻每粒通粉，所以啖啖充滿龍蝦味，內藏唔少鮮蝦肉，食落幾鮮爽。因為喺試食關係，正式個賣相會好似以下幾款，以小碗盛載，伴有少少沙律菜及法包。
黑松露通粉 $72（單點價）第二道喺黑松露通粉，可以講其貌不揚，但實際喺真人不露相，同樣即叫即做，黑松露香味非常突出，醬汁柔滑，淨食個通粉都可以令人回味，但加埋鹹火腿粒就更加一流，原來烚通粉喺用上雞湯，所以真喺鹹香有層次。咪以為佢得嗰一碗仔份量，食起嚟都唔少，因為個碗勝在夠深，同埋咁嘅賣相又幾別緻。跟通粉仲有3片蒜蓉包，新鮮烘焗，咬落好鬆脆，又帶有香草及蒜香，好食！
紅酒燴牛尾 $68（單點價）據介紹，燴牛尾又喺晌工場預先做好，真空包裝後送到店面，遇有落單就即時翻熱。一盅牛尾約有4-5件，堆到一碗滿滿，牛尾主要以蕃茄、洋蔥、甘筍、紅酒燴煮，充滿蕃茄香，肉質又極之軟腍，而且好入味，真喺有啲意外驚喜。因為碗底都剩番幾多醬汁，搵蒜蓉包沾埋啲醬汁就更正斗，不過，溫馨提示，剩餘嘅醬汁比較油，所以不宜沾太多，亦反映咗俾店主知可唔可以隔隔啲油，可能挑剔咗少少，但可以令食客食得更安心、更盡情。
迷你蟹肉牛肉黑白漢堡 $70（單點價）迷你漢堡，的骰可愛，若非早前麥記已推出過黑包配白芝麻，白包配黑芝麻，相信一黑一白漢堡會幾有話題性。白漢堡配以芝士、手刴本地牛肉、蕃茄及生菜，較為平實，包面脆，但包身有啲乾，還好喺件漢堡牛肉做得不俗，鬆化富肉味；相反，黑漢堡以沙律醬、蟹肉餅、蕃茄及生菜為配搭，蟹肉餅口感唔錯，好鬆軟，好有蟹肉味！
此外，肉醬千層麵嘅肉醬由工場預製，而卡邦尼忌廉汁吸管麵嘅麵條都頗特別，有機會都要試一試先。主菜食過以後，一場嚟到Lassana真喺唔可以錯過佢啲甜品囉，就算我哋食得幾飽吓，一樣可以為甜品撐到底。曲奇妙趣窩夫 $58
估唔到原來我哋真喺幾大食，仲可以有位頂埋個窩夫，點解咁講，因為窩夫個實都唔細，食起口嚟都還算鬆脆，不過就較有蛋香，據介紹原來用上湖北蛋，蛋味較濃。再加入Oreo餅乾、原味及芝麻味海綿蛋糕粒、鮮忌廉、兩球雪糕，幾款材料隨個人喜好混合嚟食，別有一番滋味！
心太軟 $48雖然個朱古力蛋糕嘅流心效果唔算好澎湃，但至少都做到有朱古力漿嘅湧流，況且，個蛋糕帶有重重濃香嘅朱古力味，再配襯上以85%朱古力所做嘅雪糕，兩者混和一起食，除有冰火嘅感覺之外，濃郁嘅朱古力味真喺化不開。題外話，碟中以紅莓及藍莓做裝飾，刻意嘅排列睇出店員晌細節上都有花上心思。
飲品方面，友人就點咗一杯特色凍飲（Lassana Chillers）試試，而小弟呢？都喺鍾情佢啲咖啡多啲。巨峰飄浮梳打 $38
Lassana Chillers分咗4類：特色沙冰、飄浮梳打、特色梳打及凍檸荼，前3者都有唔同味道選擇，就好似友人所揀嘅飄浮梳打，有巨峰、荔枝、奇異果、草莓、芒果。將大大球雜莓雪糕放入冰透梳打水中，做出飄浮效果，賣相吸引。而巨峰糖漿沉於杯底，所以要先攪勻再飲，聽佢分享，話杯梳打冰涼透心，甜度適中，巨峰糖漿所帶出嘅提子味頗真實，的確好飲。
鮮奶咖啡 $28（中杯） / $32（大杯）自從上次晌Express Bar by Lassana跟店主之一Tracy學拉花及一些咖啡知識後，飲Latte唔再單單睇佢拉花靚唔靚、複唔複雜、味道香唔香、滑唔滑。眼前杯鮮奶咖啡賣相真喺一流，拉隻鳳凰真喺唔易，既複雜，又拉得優雅，要留意喺鳳冠最後喺對番杯身嘅餐廳商標，以前我就會以為喺咖啡師「符碌」做到，查實原來喺刻意拉成咁。此外，落奶嘅手勢相當好，因為小弟無加糖，無攪過，飲落去就可以感覺到咖啡跟奶泡沖嘅時候已經做出均勻嘅口感，加上柔滑香醇，好滿意！
整體而言，幾款新餐味道不俗，價錢都好合理，而甜品、咖啡跟對上一次比較，質素絕對保持到水準，其實，環顧入座率及翻枱速度，相信佢哋已做出一定嘅成績，食客對其出品都有個肯定。睇見一群年青店員殷勤工作，敬業樂業，令氣氛都輕鬆啲，希望佢哋都繼續努力，唔單食物，服務都做得更好，讓客人都食得開心愜意。小弟家住美孚，過嚟荔枝角真喺行都行得到，所以，好期待新分店嘅開張。
Post
