孔夫子 (Club East洞天) (Closed)

呢度係食孔府菜既，但究竟係咩黎呢，我黎過兩次都唔係好清楚，不過野食最緊要好味。上次黎係食晚市，今次就試下黎飲茶啦。其實點心選擇唔多，不過都有部分小菜小食同粉麵飯可以點，都唔錯。先黎個砂鍋魚蓉炒飯，份量係有茶餐廳size咁大，炒得好乾身，飯粒粒粒分明；魚蓉鹹鹹地，炒埋一齊掉掉味，唔會過鹹，好食啊。再黎係小食，呢個脆炸南乳肉真係世界級好食。佢係將薄薄既肥豬肉用南乳醃左，然後炸到個表好酥脆。一上枱熱辣辣，咬入去唔係肥而係甘香，亦因為佢切得薄，所以一啲都唔會癡牙，似係半溶既狀態，好回味。另外我地仲叫左幾樣點心，質素都唔錯架，可以一試再試。總括黎講，呢度坐得好舒服，空間感充足，枱與枱之間都好闊落；而且侍應都好多，態度好好；最重要係食物真係高質，值得推介。