高街麵霸 (Closed)

想試呢間車仔麵嘅原因係因為佢有雞子食，無錯！係雞子，同身邊朋友打邊爐，一聽到雞子，大部份嘅朋友反應都係當我異形咁，見到佢哋嘅厭棄眼神，為免影響朋友食慾，所以往往都會放棄呢個咁孤獨嘅選擇。車仔麵有得揀雞子仲唔係開正我果「飯」！一入嚟見到好幾枱都係外國人，店員們比較內斂一D，有位就自己坐啦！我揀咗推介嘅滷水雞子，麻辣芽菜，滷水豬腩片，麵底揀推介嘅刀削麵，湯底係腩汁麻辣（兩隻椒中辣）。 麵份量對女士嚟講適中，男人未必夠飽。刀削麵未見突出，以為推介會好得，麵質唔夠彈牙，同超市買嘅麵差唔多感覺。芽菜爽口帶少少麻辣味，雞子滷得剛好，唔會煮到爛晒！滷水豬腩片都好入味，食落有濃濃嘅滷水汁味道，腩片皮油入口溶化，但肉質就唔夠鬆軟。 湯底都幾濃，不過可能我選麻辣中辣，所以已經食唔到腩汁味。中辣都幾辣吓，同埋都幾多花椒粒，食到個咀猶如有千萬隻熱鍋上的螞蟻在跳動咁！呢個時候就醒起我order咗嘅烏龍茶呢？！原來係店員漏咗單呀！螞蟻在舞動全唇呀！！！另外我試堆朋友叫嘅蠔皇冬菇，佢用鮮冬菇炆，冬菇嘅甜度應該係落咗糖去炆，湯底係清湯小麻辣，呢個啱D唔太食得辣嘅朋友選擇。