Video
Read full review
2021-12-17
2115 views
秋風起，除咗食臘味之外，仲係食煲仔飯嘅季節，係天氣轉涼嘅時候，一打開個煲蓋，聞到油香撲鼻而來，香港人絕對抗拒唔到呢一種咁港式地道嘅美食。今次介紹嘅呢一間煲仔飯，之前已經食過一次，上年去食已經係大排長龍，今年再去食依然無變，絕對係荃灣煲仔飯嘅代表，今年再去睇吓佢究竟有冇退步。荃灣既江湖小棧係一間以武俠為主題既港式餐廳，主打煲仔飯，以佢嘅賣點就係除咗豉油之外，仲有秘製豬油，邪惡嘅豬油撈埋煲仔飯入邊非常惹味，令到佢大受歡迎，因為豬油嘅香味令到飯味提升幾個層次，客人仲可以自己揀唔同嘅配料，好似牛肉、臘肉、臘腸、滑雞、肉餅、排骨、咸蛋、窩蛋等。另外煲仔飯嘅靈魂飯焦都係呢度嘅吸引人之處，因為佢哋可以做到黃金幾完美飯焦。餐廳喺荃灣既鱟地坊，喺荃灣一個舊市集嘅特色地方，亦都係其中一個最多嘢食嘅荃灣地區，由路德圍經天橋行去對面，就可以搵到呢間睇落平平無奇但深藏不露既餐廳。我上年第一次嚟呢間餐廳，六點幾嚟到嗰時俾佢嘅人龍嚇親，出邊有10幾20人，最後過咗一個鐘多啲鍾意入到去，不過餐廳嘅好處就係攞飛，而且會大概話你知幾耐可以入去，所以我一個鐘我就去開附近行吓，差唔多時間到就真係差唔多可以入去。今年我吸取教訓
荃灣既江湖小棧係一間以武俠為主題既港式餐廳，主打煲仔飯，以佢嘅賣點就係除咗豉油之外，仲有秘製豬油，邪惡嘅豬油撈埋煲仔飯入邊非常惹味，令到佢大受歡迎，因為豬油嘅香味令到飯味提升幾個層次，客人仲可以自己揀唔同嘅配料，好似牛肉、臘肉、臘腸、滑雞、肉餅、排骨、咸蛋、窩蛋等。另外煲仔飯嘅靈魂飯焦都係呢度嘅吸引人之處，因為佢哋可以做到黃金幾完美飯焦。餐廳喺荃灣既鱟地坊，喺荃灣一個舊市集嘅特色地方，亦都係其中一個最多嘢食嘅荃灣地區，由路德圍經天橋行去對面，就可以搵到呢間睇落平平無奇但深藏不露既餐廳。
我上年第一次嚟呢間餐廳，六點幾嚟到嗰時俾佢嘅人龍嚇親，出邊有10幾20人，最後過咗一個鐘多啲鍾意入到去，不過餐廳嘅好處就係攞飛，而且會大概話你知幾耐可以入去，所以我一個鐘我就去開附近行吓，差唔多時間到就真係差唔多可以入去。今年我吸取教訓，係五點十就到左餐廳諗住做第一批客，終於比我成功，但我只係咁岩好彩入到，係啱啱好最後一枱客，因為原來餐廳改咗5:30開門，呢個我睇OpenRice嘅時間都唔知，所以六點前呢間餐廳就已經滿座，另外話你知呢知間餐廳只做晚市，佢淨係做夜晚煲仔飯小菜就已經足夠，可以見到佢有幾受歡迎。另外餐廳都好細心會擺一啲位係出邊比大家坐住等。
江湖小棧店如其名，入邊嘅裝修好有武俠小說嘅感覺，好似客棧，連餐牌都係武林秘笈、英雄帖，每一本Menu各方面都唔同，我呢一本係玄冥神掌，確實有江湖嘅味道。
睇過「玄冥神掌」，餐廳主打即叫即做既煲仔飯，款式多達23種，全部都係$83一煲，除咗可以揀招牌口味之外，仲可以自選餸菜，最多可以揀3款餸，特別既餸好似有豆豉鯪魚、蝦膏、榨菜，好似食車仔麵咁，另外仲有煲仔菜、小菜、生滾粥、小食等等，小菜嘅款式會比起一般大排檔少。
另外一提，呢間小店係前年11月曾經遭遇過催淚彈攻擊，老闆親身感受過強勁既催淚煙，感到無比刺痛，非常嬲，因為警察完全顧忌市民既安全，特別係有坐輪椅既老人家、一家大小有嬰兒既客人，知道投訴無門，於是係門外貼紙宣佈拒絕招待警察，雖然表示過唔好強行標籤自己餐館係咩顏色，但此舉再加上被示威者啟發後，之後有派水舒緩受催淚煙影響既街坊，足以證明係良心既小店。
-
1️⃣ 窩蛋牛肉煲仔飯 💰83（👅: 8.5/10）
窩蛋牛肉煲仔飯
$83
143 views
2 likes
0 comments
豬油
15 views
1 likes
0 comments
呢度嘅時候係鹹豉油，而唔係甜豉油，豉油唔使落咁多已經好足夠，落得多反而豉油會集中係底部同埋飯焦，變咗有啲地方好重味有啲地方淡啲，而且太多豉油會蓋過餸嘅味道，而加咗豬油個煲仔飯香味突出，特別香口，但都唔好落咁多，因為太多會令到個飯比較濕。
飯係粒粒分明，軟硬適中，水份啱啱好，夠乾身，淨係聞已經聞到飯香，食落有少少米香，加咗豬油絕對係香氣撲鼻，而且同飯香相輔相成，再加埋豉油好難唔好食。
窩蛋撈堝埋個飯，食起上嚟充滿蛋香，令到個飯味道層次更加豐富，而牛肉方面都算嫩滑，咬薄無筋，有少少肉味。
最後就係煲仔飯最重要嘅飯焦，呢度嘅飯焦差唔多係完美，如果識得整飯焦嘅話，呢度嘅飯焦絕對係頭盔型，可以成塊起出嚟，唔會痴住個煲，飯焦呈金黃色，再加上豉油令到色澤更加令人流口水，咬落去脆口但唔痴牙，有小小煙韌，食落去唔會過燶，只係表面有少少焦，好似食緊米餅，絕對係恰到好處。
-
2️⃣ 北菇滑雞鯰魚煲仔飯 💰83（👅: 8.5/10）
北菇滑雞鯰魚煲仔飯
$83
20 views
1 likes
0 comments
食左幾舊入口幾滑，食落鮮嫩冇骨，而冬菇份量夠多，滑雞都唔小，食落算嫩，不過兩者本身個味道都係偏淡，因為兩樣都冇醃過，要靠豉油或者其他配料。
-
3️⃣ 招牌燒通菜 💰48（👅: 7.5/10）
招牌燒通菜
$48
26 views
1 likes
0 comments
通菜燒過嚟，但唔會太乾身，食起嚟有汁，而且會有燒過嘅香味，但唔會有燶味，食落因為有好多蒜頭粒細，味道濃郁，香氣十足，但同時味道都會重啲鹹啲，食起嚟唔算好特別。
-
4️⃣ 錫紙花蛤粉 💰108（👅: 8.5/10）
錫紙花蛤粉
$108
32 views
2 likes
0 comments
上枱個時出晒煙，而且係用錫紙上所以可以保持溫度，份量非常多，花蛤夠大隻飽滿，洗得夠乾淨，咬落去滿足，食落冇沙，而且有鮮甜味，因為佢有唔少蒜頭，所以食落香辣蒜蓉味重，但唔會好辣，非常惹味，不過原來佢好似可以要求辣度，我冇要求不過食落就唔辣。
配料方面仲有金菇、粉絲、洋蔥，洋蔥令到香味更加突出，粉絲絕對係將花甲既鮮甜，同埋蒜蓉辣味嘅精華吸晒入去，食落去非常入味，忍唔住一啖接一啖。
-
5️⃣ 酸菜煮鱸魚 💰138（👅: 8/10）
酸菜煮鱸魚
$138
21 views
1 likes
0 comments
上面嘅係鱸魚肉片，分量非常多，湯底係用新鮮鰂魚煮成濃郁既魚湯，另外仲有酸菜、豆卜，可以睇到佢入邊係冇用花椒。
魚嘅份量以呢個價錢來講係非常之多，而且每一舊都非常大舊，比起平時用生魚，呢度係用原條鱸魚，入口夠嫩滑，啖啖肉，不過部份位會有骨，唔似平時酸菜魚嗰啲冇骨食落咁爽。
而湯方面飲落去辣味同酸味都好小，反而係飲到魚湯嘅鮮甜味，所以好形容佢係似一個有酸菜嘅魚湯，多過以酸菜熬製而成嘅湯，如果鍾意飲到魚嘅味多過又酸又麻既，或者對於唔食得辣嘅人來講，呢個湯係唔錯，但如果係抱住食到川菜個種會失望。
-
6️⃣ 牛舌 💰25（👅: 8/10）
牛舌
$25
27 views
1 likes
0 comments
-
7️⃣ 汽水 💰13（👅: 7/10）
-
🌟今時今日要喺香港食到一煲好嘅煲仔飯都唔容易，依家煲仔飯煮法都五花八門，但煲仔飯最主要就係要火候啱啱好，要有完美嘅黃金飯焦，有粒粒分明而且唔會過濕嘅飯粒，加重味道香味但唔會過分嘅豉油，所以一個好食嘅煲仔飯絕對唔簡單，而呢間餐廳每樣都做得唔錯，比起配料方面佢嘅飯做得更好，今次煲仔飯未試到佢最出名嘅排骨同臘味，但秋天仲未完結，好快我就會再嚟。
餐廳裝修用心，雖然設計唔係為咗來俾人打卡，但我今年去同上年去，入邊嘅裝修都係冇變過，好似係俾人打卡，但入邊嘅嘢食係絕對有質素，唔係好睇唔好食。要挑剔嘅就係呢度太多人去，大家如果唔係六點前就到，就有心理準備要等一個鐘。
荃灣絕對係一個咩都有得食嘅美食天堂，而呢一間小菜煲仔飯客棧，絕對係荃灣唔可以錯過嘅一間餐廳，如果經過荃灣、甚至係想食都好食嘅煲仔飯，絕對值得黎一試呢度師傅嘅武林武功。
煲仔飯飯焦:
🥇荃灣 江湖小棧
🥈西環 嚐囍煲仔小菜
煲仔飯飯粒分明乾身:
🥇西環 嚐囍煲仔小菜
🥈荃灣 江湖小棧
煲仔飯調味:
🥇荃灣 江湖小棧
🥈西環 嚐囍煲仔小菜
煲仔飯配料:
🥈荃灣 江湖小棧
🥈西環 嚐囍煲仔小菜
-
👅味道: 9/10
🍴環境: 7/10
💰消費: $100-200pp (服務費: NA)
Post
