燒烤堂 (Closed)

每逢秋冬除咗燒下燒下同滾下滾下，一定會諗起串燒。心瘾起，咁岩諗起係角落既燒烤堂，就同朋友去試下。燒烤堂依個名一睇就知有串燒賣，雞牛豬魚海鮮蔬菜都齊哂，但其實除咗串燒，依到仲有好幾款前菜刺身，小食同穀物類，牛油焗乜乜乜系列。飲品有啤有Ｗｉｎｅ有清酒，最岩Happy Friday嚟輕鬆下～我哋叫咗安格斯牛小排、墨魚咀、芝士煙肉燒廣島蠔、蒜茸粉絲燒蘇格蘭蟶子皇、燒烤堂蒜茸茄子。牛小排燒得唔生唔熟岩岩好，墨魚咀香口，而兩款海鮮都新鮮，蠔夠juicy，整體嚟講肉食唔錯，但最驚喜既係茄子，茄子開咗邊加咗蒜茸同蔥花係面，表面既蒜燒到金黃色，好香又脆，埋燒到軟身既又多汁既茄子，口感唔錯，不得了啊！加埋牛油芝士焗雜菇依個十分邪惡既組合，重口味人士必叫啊。 我哋仲另外叫咗軟殼蟹沙律，軟殼蟹炸得唔會太乾，沙律係日式沙律，仲有鰻魚玉子燒、鵪鶉蛋蟹子蕎麥麵。軟殼蟹沙律有水準，而其他日式嘢，以燒烤店嚟講幾好。順帶一提，我哋貪得意叫咗翡翠螺刺身同生蝦，估唔到依到連生嘢都ＯＫ，鮮甜！最後以日本一口甜薯同燒菠蘿做甜品總結，依兩樣嘢無得輸啊！