九龍坎麻辣火鍋

Open Now

Now Closed

港人至愛打邊爐，呢間主打麻辣火鍋，裝潢設計獨特，古色古香，有得Cosplay着住漢服食，多人嚟仲可以Book房卡拉OK，中午同宵夜時段有放題，其他時間就以單點為主。湯底要咗鴛鴦，四川麻辣牛油紅鍋係佢哋嘅招牌，香濃惹味，越食越上癮。私心推介花膠雞湯，飲落清甜，黏黏哋咁，花膠大塊且入口滑溜，雞件都算嫩，值得一試。肉類有珺珺功夫牛，肉質鮮嫩，牛味突出，大大塊啖啖肉。火箭魷魚賣相一流，記得唔好錄太耐唔係越縮越細，咬落超級爽彈，好有驚喜。潮汕牛筋丸同樣出色，Q彈可口，食完都幾飽。蔬菜類有油麥菜、白蘿蔔同鮮藕片。細分都唔少，而且件件都好大塊，建議要早啲放落去煮，全部吸滿湯汁嘅精華，非常惹味。鮮腐竹薄切，滑嘟嘟，豆味比想像中出，正。值得一讚係個調味料區域，有常見嘅蔥、蒜、豉油、醋、辣椒醬之外仲有香油、芝麻醬、沙嗲醬、腐乳醬、韮花醬等，應有盡有，雖然好肥但真係忍唔住咩都點一餐🤣