潮樂園 (和富道)

Open Now

Now Closed

屋企人係潮州人，同親一齊出街食潮州打冷，好多時例牌都係叫滷水拼盤、蠔餅、蠔仔粥、鹽焗烏頭呢啲傳統菜式，好少有機會俾我地呢啲做細既拍板叫菜。難得女友話想食下潮州菜，所以今晚專情黎到北角呢間正宗潮州菜館落腳。餐廳牆邊同餐牌都印有好多菜式相，馬上打消原本想食傳統菜式念頭。其中見「汕頭鴛鴦卷」貌相幾特別，起初以為係舊式點心鴛鴦卷(即芋絲卷同蘿蔔絲卷)，及後從伙記口中先知係呢度既新派菜，一於試下。鴛鴦卷原來係用芋泥同糯米揉合而成，外面卷左層米紙卷先落鑊炸。外脆內軟得黎仲好香甜，黏而不腻，食到我地停唔到口 (溫馨提示：驚滯既朋友記得唔好一個人食太多)。呢度「沙嗲牛肉炒河」($68)又係好有家鄉風味既一道菜，因為沙嗲醬直接由鄉下入貨。花生味同椰奶味都好出，幾乎搶走牛肉味道。至於河粉就冇咩驚喜，但見碟炒河大份得黎又多醬，計落都算物超所值既。正當細味眼前碟炒河，忽爾好想食到大時大節嫲嫲親下廚既潮州炒麵……但願下次黎食潮州菜都能嚐回味呢種感覺。