回味無窮印尼餐館

Open Now

Now Closed

聞說路德圍附近有間印尼菜好味，但一直無試。今晚因為阿哥提議，所以去左，佢之前食過覺得不錯，所以係食過翻尋味。去到發覺店子原來好細，我地三個人得番一張坐出面的檯，但果張檯係對正抽油煙機排氣，叫人點坐？還好對面燈飾鋪已關門，老闆就幫我地搬張檯去對面自成一角，型～三個人都細食或唔想太飽，先定下策略睇下有幾大碟再算。叫左個巴東牛肉，椰汁雞，串燒，等都算正常時間，可能因為佢個格局似家庭式經營啦。巴東牛肉用牛展，牛展大大件好足料，牛展好腍，巴東汁辣辣地幾開胃，一碟份量應夠三至四個人用，不錯。椰汁雞除左雞仲有隻開邊蛋，蛋面炸過，彈牙香口好多。個汁幾好味，有椰香又辣辣地，撈飯最好，但我地今次隻雞唔多入味，希望下次好ｄ啦。串燒我地叫左雞同牛，兩樣都好好味，雞肉明顯見到上面既醃料，牛肉唔韌，兩者配上面個花生沙爹醬都好好味呢。最後還叫左兩杯飲品，一杯印尼咖啡，一杯熱檸茶，阿哥話杯印尼咖啡得，但因為夜晚真係唔敢飲咖啡，下次再試吧。這間店真的不錯，我覺得好過某ｄ大大間的印尼菜，有機會再黎幫襯吧。