煮意

Open Now

Now Closed

之前經過上環蘇杭街見到有間細細哋嘅餐廳，望落幾靚不過嗰日已經食咗嘢，第二個禮拜特登走返去上環試吓。餐廳位於蘇杭街其中一個轉角位，喺樓梯位側邊。餐廳都算細間，我諗最多可以坐到5到6人，我入去嗰時成間餐廳只係得老闆老闆娘同埋另一位食客，加埋我總共得四人。餐牌上一共有九款菜式，我第一眼就比佢個蒜香大蜆意大利粉吸引到。跟餐可以要湯或者餐飲，亦可以加五蚊兩款要晒，不過我就唔係特別肚餓，所以淨係要咗杯凍檸茶就算。到我碟意粉到嗰時，另一位食客巳經走咗，餐廳入面嘅聲音得返老闆、老闆娘同埋佢哋睇緊嘅飲食節目，感覺幾舒服。意粉嘅蜆又真係幾大隻，個名冇改錯，而且都好多隻，有成七至八隻蜆。總括感覺幾舒服，食物嘅味道亦有水準，下次可以帶埋朋友一齊試。