富豪酒家

Open Now

Now Closed

同朋友去Donki 逛完，佢帶咗我嚟呢間酒家食午餐，原來係米芝蓮食府。大家都係第一次嚟，叫個午市自選精美小菜套餐，午市套餐可自選三款或五款小菜，再加一款雞或鴨，另送靚湯、甜品。我哋揀咗三款小菜嘅套餐。富豪靚湯：無花果雪梨瘦肉湯，見到有大大片雪梨、南北杏同百合，味道清甜，感覺滋潤。另外揀咗荔芋香酥鴨半隻，薄薄嘅鴨皮連肉釀入芋頭蓉，炸到鴨皮酥脆夾住軟滑嘅芋蓉，兩種口感一次過品嚐，幾惹味。第一個自選小菜係野生銀魚煎蛋，大大條銀魚白白淨混合香蔥及雞蛋，煎至兩面金黃，味道充滿蛋香，好吃哦。第二個係海蝦肉碎茄子煲，賣相吸引，蝦肉鮮美，茄子連同肉碎一齊食，醬汁入味又唔會太濃。最後一個係勝瓜雲耳炒叉燒 ，叉燒肥瘦適中，勝瓜嫰口無渣，配埋爽脆雲耳，口感豐富。甜品係蛋白生磨杏仁茶，蛋白香伴隨杏仁香，美顏配搭為呢個午餐畫上句號。响富豪酒家食家常菜，滿有驚喜啊。