富豪酒家

Open Now

Now Closed

富豪酒家🌟無花果燉梨湯🌟富豪炸子雞🌟荔芋臘味煲🌟雙欖蘭度炒魚球🌟豉汁煎釀三寶🌟杏仁燉蛋白之前聽朋友話富豪酒家啲嘢食好出色，所以就搵咗個星期五同朋友一齊去食lunch，試吓係咪真係咁好食。因為天氣都比較凍，所以一坐低就叫咗一個無花果燉湯。燉湯好足料，入面有成半個梨。湯嘅味道係微微甜，好啱喺冬天嘅時候飲番碗。小菜方面，我哋叫咗四款，首先必點嘅係富豪炸子雞。炸子雞嘅外皮係超級香脆，炸到好似蟬翼咁薄，但係咬落去係有薯片嘅爽脆口感，入面嘅雞肉依然保持嫩滑，係一個高水準嘅炸子雞。要提一提令我有驚喜嘅荔芋臘味煲，成個臘味煲嘅奶香味都好重，當中嘅芋頭係炆煮到好軟糯。作為一個芋頭愛好者，個人認為黎到值得試一試呢道菜。跟住喺雙欖蘭度炒魚球，芥蘭係揀選咗最嫩嘅部份，每一啖都入口清甜無渣，配上厚切嘅生魚球，好味到我同朋友成碟都食清光ar。最後餐廳送上碗杏仁燉蛋白，自己本身好驚杏仁嘅味道，但係朋友試咗一啖之後話比想像中好飲，所以我都忍唔住試一試。點知一試真係覺得好神奇，一入口嘅第一啖依然會有杏仁特殊嘅味道，但係去到舌頭尾端嘅時候就會冇咗呢一種感覺，反而覺得碗杏仁茶好香濃，令我不斷想再飲，最後成碗都飲晒。