閨•家 (寶榮大廈) (Closed)

近期出面好多病菌，除咗帶口罩同做好個人衛生，食得健康啲，增加抵抗力都好重要！不如，今日就飲番碗老火湯，滋身補益啦。不過，我又唔識煲湯，而A姐又要番office返工，所以近近哋去到屋企附近，位於炮台山嘅閨•家，價錢夠實惠，仲好有家嘅味道。蟲草花冬菇煲雞湯星期一至星期日，日日都唔同款！呢個跟餐嘅老火湯，細細碗但就好足料！湯渣勁多，有蟲草花同冬菇，個湯好濃好甜，而冬菇入晒味又夠稔。完全無味精同唔口渴！麻辣雞腎小食方面，揀咗麻辣雞腎，麻香但唔辣，好有口感。蓮藕餅豬扒飯呢度嘅招牌菜就係豬扒，香茅味好香，而大大塊既豬扒勁鬆軟，如果可以厚切小小就更完美。而蓮藕餅都唔錯，表面乾身，但咬落去仲有肉汁咇出嚟！咖喱雞飯辣度都有得揀，我哋就揀咗中辣。咖喱香濃，雞嘅份量唔少，仲要係雞脾，好入味！但每次食咖哩，除咗主角之外，啲配菜，好似薯仔同蘿蔔，係更吸引！食到照鏡，好滿足。唔記得影相嘅凍檸茶（少甜），A姐話係佢飲過最好味嘅凍檸茶沒有之一，茶味好濃，比例啱啱好！