Nathanhouse (Closed)

約咗幾個舊同事一齊食個飯吹吓水，其中一個介紹咗喺奧海城嘅Nathanhouse，佢話呢間西餐夠隱蔽，環境舒適，啱晒我哋幾個去敍舊。晚餐主打set dinner，二百幾蚊左右包餐餐湯/沙律、前菜、主菜同埋甜品，一人套餐會有多啲甜品嘅選擇，二人套餐就跟兩款前菜。首先係生蠔，經理極力推介我哋試吓，啲生蠔啱啱由澳洲smokey bay 新鮮運到，33蚊隻，我哋每人要咗一隻，果然好新鮮，唔會好重海水味。是日餐湯係忌廉南瓜湯，個湯幾creamy不過南瓜味淡咗少少；是日沙律係烤雞沙律，雞肉好嫩滑，加埋啲芝麻醬幾開胃。前菜有兩款，洋蔥圈同埋燒豬腩肉，洋蔥圈雖然望落炸到黑晒，但其實係用咗黑啤粉漿去炸，食落仲有少少黑啤味添，豬肉睇落肥但咬落唔會成口油，同生菜一齊個組合幾正。正餐有三款，分別係「西京燒比目魚柳」、「虎蝦香濃芝士意大利飯」同埋「美國黑安格斯肉眼扒」。個魚煎到金黃色，賣相唔錯，點埋佢隻醬汁甜甜哋幾好味；同事怕生肉所以塊牛扒要咗七成熟，肉味香濃，四個人分啱啱好；個飯好creamy但食完唔覺得滯，三個主菜都相當好。整體而言餐廳環境舒適，適合幾個朋友一齊嚟食餐飯。