Video
Read full review
2008-11-12
15 views
上星期日冇乜嘢做，好多時間周圍行，我哋就決定再去呢間食過一次但係印象好好嘅意大利餐廳食個悠閒午餐，順便喺西貢行吓街。去到都下晝兩點幾嘞，餐廳入面都有兩枱客，不過就好靜。呢間餐廳情調真係一流，全場用木色嘅裝修，燈光亦好柔和，牆上面有好多花樽同雕塑做裝飾；天花採用咗藍色嘅壁燈設計，配上一把古色古香嘅吊扇，感覺優雅。成間餐廳分為兩層，不過夜晚先會開埋樓上，燭光晚餐談心傾計最啱！店主係一個好友善嘅外國人，成日同啲客傾計，上次就整咗杯 smoothie 比我哋飲，好熱情！ 我哋都幾肚餓，就問佢有咩推介，佢就介紹我哋試吓個湯，我哋就開始呢個悠閒午餐： Focaccia 意式香草麵包配橄欖油黑醋及牛油：呢個係餐前小食，每枱都會有嘅，完全免費！麵包質感唔算細密，但配埋油醋就幾好味，亦可以搽牛油一樣好食！ Spanish Seafood Soup 西班牙海鮮湯：既然店主推介，梗係要試！呢個湯 portion 都幾大，兩個人分享足夠有餘；上枱嘅時候賣相真係好靚， 差啲唔捨得飲添！湯嘅面頭有啲香草，材料就有藍青口、大蝦、魷魚、蜆，當然唔少得大量甘荀同洋蔥。試一啖，不得了！好濃烈嘅海鮮味，加埋蔬菜嘅天然甜味，
上星期日冇乜嘢做，好多時間周圍行，我哋就決定再去呢間食過一次但係印象好好嘅意大利餐廳食個悠閒午餐，順便喺西貢行吓街。去到都下晝兩點幾嘞，餐廳入面都有兩枱客，不過就好靜。呢間餐廳情調真係一流，全場用木色嘅裝修，燈光亦好柔和，牆上面有好多花樽同雕塑做裝飾；天花採用咗藍色嘅壁燈設計，配上一把古色古香嘅吊扇，感覺優雅。成間餐廳分為兩層，不過夜晚先會開埋樓上，燭光晚餐談心傾計最啱！店主係一個好友善嘅外國人，成日同啲客傾計，上次就整咗杯 smoothie 比我哋飲，好熱情！ 我哋都幾肚餓，就問佢有咩推介，佢就介紹我哋試吓個湯，我哋就開始呢個悠閒午餐：
Focaccia 意式香草麵包配橄欖油黑醋及牛油：呢個係餐前小食，每枱都會有嘅，完全免費！麵包質感唔算細密，但配埋油醋就幾好味，亦可以搽牛油一樣好食！
Spanish Seafood Soup 西班牙海鮮湯：既然店主推介，梗係要試！呢個湯 portion 都幾大，兩個人分享足夠有餘；上枱嘅時候賣相真係好靚， 差啲唔捨得飲添！湯嘅面頭有啲香草，材料就有藍青口、大蝦、魷魚、蜆，當然唔少得大量甘荀同洋蔥。試一啖，不得了！好濃烈嘅海鮮味，加埋蔬菜嘅天然甜味，好得！大蝦都幾大隻，肉質仍然好彈，好新鮮！青口同蜆嘅味道唔會因為用嚟整湯而淡咗；相反，湯嘅鮮味將佢嘅味道再一次提昇！魷魚一樣喺個口度扎扎跳，跟湯上嘅仲有兩塊香草烤餅，聞起嚟好香，點湯食唔錯！飲完呢個湯已經覺得值回票價，更加期待之後上嘅食物！
Antipasti 特色拼盤：好豐富，有 Artichoke 雅枝竹、Salami 莎樂美腸、 Brie Cheese 布利芝士、White Button 白磨菇、Prama Ham 意式風乾火腿、 蝦，仲有啲生菜！雅枝竹可能係意大利菜入面最貴嘅蔬菜類，入口味道唔係太特別，可能我唔識欣賞啦！有啲似稔咗但係冇荀味嘅荀；莎樂味腸就肉味濃郁，芝士亦好香但食落唔太重味，磨菇好爽而且菇味濃；最好味梗係 Prama Ham 啦，唔會過鹹啱啱好，同菜絲一齊食都好夾；蝦細細隻好彈牙，味道鮮美，砌成心型有心思！成個拼盤雖然好似好多油咁，但係都係橄欖油，侍應仲會好細心走埋嚟問你要唔要加少少黑椒粒，加咗仲好味，無得彈！
Caesar Salad 凱撒沙律：生菜新鮮爽脆，咬落去真係卟一聲，菜入面嘅水份好飽滿，好清新！麵包粒大塊啲但焗得又香又脆，芝士片係 Gorgonzola ，味道偏鹹重，不過同菜一齊食就好好味，更可以講係佢就帶起晒成個沙律嘅美味添， 呢個沙律真係好得！
Margarita Pizza：有晚又係睇覓食天下話要試一間店嘅意大利 Pizza 好唔好食一定要試 Margarita，因為淨係得茄醬同芝士，冇花款嘢，好唔好食一試就知！呢度嘅 Margarita 除咗茄醬同芝士外，面頭仲有啲燈籠椒做裝飾。Pizza 底好薄好脆，茄醬味啱啱好，而芝士就好香好濃，食咗半個一啲都唔會覺得膩滯，實在好好味！
食完呢個午餐我哋冇食甜品，因為下一站預咗係滿記，不過上次食過佢啲甜品一樣同佢其他嘅出品一樣，細緻精彩，味道賣相無一不美！呢間餐廳無論幾遠都好，始終係我食意大利菜嘅心水之選！
Post
