Olive Cafe (新領域廣場) (Closed)

餐廳位於荃灣嘅新領域廣場，提供多款西式料理，裝潢以木系為主，天花板掛滿綠色植物同吊燈，燈光較柔和，令人感覺舒適🌳 另外提提大家想食嘅話就記得要book枱，見好多人walk-in都話full咗要等下一轉～ 前菜先嚟羅宋湯，配料滿滿，酸甜度啱啱好～ 主菜係BBQ燒荷蘭豬肋骨配骨薯條，總共有六條，肉質軟嫩同時帶點肥膏，幾易脫骨，老少咸宜，搭配脆身嘅薯條同新鮮沙津菜都唔錯👍🏻 另外加咗個煙肉焗蠔，芝士味算出，口痕可以叫吓😂私心推介明太子軟殼蟹忌廉汁意粉，軟硬度適中，做到掛汁效果，醬汁嘅濃稠度都唔錯，而且每啖都食到濃郁嘅明太子忌廉汁～ 軟殼蟹大大隻，外皮炸至香脆，內裡口感結實，厚肉，性價比甚好！相對之下蒜香白酒蛤蜊意粉就較清淡，麵條油潤煙韌，蛤蜊肉質鮮嫩，整體感覺無咁膩～