掌壽司 (Closed)

臨近聖誕，好多地方都做緊大減價優惠。觀塘嘅駱駝漆大廈都唔例外，上網見幾間運動鋪都有靚優惠就拉埋老死過黎執返幾隻。行到夜晚就直接係呢度開埋餐，費事走來走去。行經掌壽司見個秋之盛好吸引就決定係店開餐，分量同價錢與朋友SHARE食啱啱好。前菜吉備奈子與八爪魚足一齊擺盤，造型覺得好靚。除左八爪魚腳，仲有少見嘅八爪魚吸盤。吉備奈子又名丁香魚，因為保鮮困難平時食開魚乾零食為多。但今餐食到新鮮嘅刺身真係一個驚喜。銀白相間而又雪亮透明嘅魚肉，細細一片都已經鮮味十足。蘸上醋味噌來吃，酸酸甜甜又涼爽，非常開胃。八爪魚腳同吸盤肉質爽脆有彈性，再三咀嚼之下咸鮮味更出。宮城珍珠蠔雖然細細隻，但都飽滿厚身，入口鮮甜回甘味長。加上冰得夠凍瑤柱位好爽口。十貫壽司。擺設簡單，拖羅及赤身以金箔點綴，更顯貴氣。與友人分享剛剛好。拖羅佈滿油脂雪花，未食已經令人流晒口水。因為魚肉上界上細密格網，所以入口加速溶化，咀嚼下滿口油香而且鮮嫩肉質清甜非常。赤貝即係同大家食潮州菜時會遇到嘅螄蚶屬同一類，只不過係大小有別。貝肉用上蝶切法做成蝴蝶形狀，食落質感柔軟甘甜中略帶澀味，味道在幾款壽司中算濃郁。海膽壽司口感軟棉幼滑，濃香甘甜味道入口