薈亞廚房 (Closed)

想叫外賣但又唔捨得比運費，但又唔想煮。掙扎咗一陣都係決定落街買嘢食。係商場行咗一圈決定都係食泰國嘢。睇Menu 發覺好多嘢都想食，於是即時約朋友過嚟一齊食，點知朋友又肯出嚟，咁我地就一齊食下嘢吹下水，一個人係屋企都真係幾悶下。呢間餐廳唔係淨得泰國嘢食，而係包括好多東南亞嘅嘢食。我地兩個人明知食唔到咁多但都叫咗好多嘢，剩低嘅可以打包攞返屋企食都唔錯。椰子煲雞湯：湯底好清甜，唔會覺得油膩。香芒大明蝦米紙卷：米紙卷越南嘢，芒果香甜配上大蝦嘅鮮甜，再加上青菜，米紙卷食落好清新。香茅燒厚切黑毛豬：呢個真係食過難忘，黑毛豬肉質豐富，配上香茅味道，更顯鮮味。馬來雜菜炸豆腐炒麵：炒麵味道都唔錯，我地兩個都食到好飽，就一人分啲攞返屋企食啦。