蜜蜜見 (Closed)

放假就會好想食甜品，去開將軍澳發掘到呢間有咸又有甜嘅甜品店。打開餐牌鹹甜嘅選擇都好吸引，見意粉餐有加配優惠，我哋就叫咗一個餐另加小食甜品。意粉餐揀咗粒粒蟹肉意粉（$88），跟餐免費配汽水或者花茶，加錢可轉其他飲品。蟹肉意粉彈牙有嚼勁掛滿香濃忌廉汁再加埋蟹子更有口感。跟餐加$16叫咗Iced Latte Macchiato ，望落好似冇冰但飲落夠晒冰凍，比起有冰嘅咖啡完美保留到咖啡嘅香味，就算飲到尾都仍然夠凍，估唔到呢度嘅咖啡有驚喜。朋友叫咗杯黑牛，$24大大杯好抵飲。小食揀咗芝士肉醬薯條（$54），雖然係小食但份量超足，肉醬味道濃郁，層次豐富，再加埋拉絲芝士，食唔停口！喺咁多款招牌甜品中，我哋揀咗香芒拿破崙泡芙（$54）-跟意粉餐可減$15，泡芙賣相精緻，非常酥脆，夾埋芒果醬吉士醬同雪糕一齊食實在係完美嘅組合，果然係招牌甜品！另一個甜品揀左新推出嘅榛子香蕉牛角窩夫（$54），牛角窩夫熱辣辣，口感酥脆夾雜陣陣牛油香，上面鋪滿榛子香蕉醬再加新鮮打嘅cream，仲要打孖上，超級滿足！呢間小店由咸到甜都咁有心思，非常值得推介！順帶一提，牆上掛咗幾幅好靚嘅原創畫作，去食甜品之餘可以欣賞下🎨好滿意