來多碗車仔麵 (康寧道) (Moved) New Location

幫公司送完野，行黎呢邊食野就搭車返屋企，不過重建好似好多地方唔同左，我都費事再亂行，見呢間車仔麵幾多人，又唔太貴。呢度唔洗剔紙，係響食物檔位排隊揀，姐姐即場執，放湯，再收錢，個感覺好似返返去中學年代。4餸都係36蚊，2餸24蚊，真係好抵。4餸要雞翼，豬紅，辣魚蛋，豆卜配米粉。湯頭顏色較深，飲一啖味道濃郁，但唔咸帶少少辣，買既時候聽到有人要中辣或大辣，應該幾刺激。雞翼滷水過，軟腍入味，肉質夠嫩。豬紅滑溜，質感唔會太散，帶少少甜味。辣魚蛋都算辣，大大粒夠爽彈。豆卜係原粒，所以索左湯都唔會浸腍晒，唔油好味。米粉軟硬度剛好，好爽口。