強記大牌檔 (Closed)

今晚又再出動去尋找大排檔係深水埗既話,耀東街我就未試過,所以都特登走一趟,去到耀東街都有好幾檔,有食粉麵,粥,小菜等等,都有好多選擇,不過我地今日既目標係強記.而且選擇坐門口,免得抄牌都唔知.點菜後,小菜都好快送到上枱,椒鹽豬扒一上枱,果種陣陣椒鹽蒜蓉香味,實在令人食指大動,香到不得了,每件豬扒都係細細件,底面都有蒜蓉粒香味,送飯一流.豉椒炒蜆好大碟呀,蜆既size適中,我食咁多隻之中,只食到一隻有沙,都算走運,個豉汁好濃.蝦醬炒通菜賣相比較亂,不過係好好味,好夠鑊氣,蝦醬味道啱啱好.臘腸糯米飯(細)有分大和細,這個份量都應該有兩個飯碗,糯米炒到乾身,煙煙韌韌,有一粒粒既臘腸同花生,好香口呀,不過油比較多.今餐都好滿意,4 款都好好味,份量都幾大碟~~~