生記粥品專家

Open Now

Now Closed

某日男朋友仔激親我﹐原本想第二朝一齊返學食早餐...結果第二朝我就一肚氣o甘返學。去到金鐘等轉車o既時候﹐見到男朋友仔抽住一袋外賣。一問之下原來係生記o既白粥。雖然耐唔耐都會經過生記﹐不過無乜邊次係見到入面仲有燈o既...所以一直都未有機會去一嘗生記o既粥。返到學﹐男朋友仔打開個膠袋﹐我已經嚇傻o左。因為碗粥實在太大碗﹐大碗到有兩碗學記o既粥o甘濟!!儘管我如何obsessive to 粥﹐一朝早食兩碗粥實在係有o的難度...於是就同男朋友仔兩份。相隔半小時﹐雖然無出煙﹐不過碗粥都仍然算熱。第一啖食落去﹐已經令我晴天霹靂!!!我自問由細食粥食到大﹐食過o甘多間粥鋪﹐暫時只係得生記俾我覺得啖粥係清甜而且可以肯定係無味精o既。雖然只係區區一碗白粥﹐而且又唔係就腳﹐不過就係因為呢碗粥可以令人如此感動﹐所以先可以日日都令好多人大排長龍都毫無怨言。